तीजमा तडकभडक गर्ने होसियार हुनु है, अख्तियारले समाउला

अख्तियार दुरुपयोग अनुसन्धान आयोगले कार्यालय समय बाहिर सरकारी सवारी नचलाउनदेखि नजिकिँदै गरेको तीज पर्वलाई भट्किलो नबनाउन निर्देशन दिएको छ । निर्देशन उल्लंघन गरे कारबाही गर्ने चेतावनी अख्तियारले दिएको छ । अख्तियारका आयुक्तहरूको मंगलबार बसेको बैठकले सरकारी सवारीसाधन भोजभतेरदेखि लिएर मन्दिर जानसम्म प्रयोग भइरहेको भन्दै यस्तो कार्य तत्काल रोक्न मुख्यसचिवलाई निर्देशन दिएको हो । ‘सरकारको स्वामित्वमा रहेका सरकारी सवारीसाधनहरू सार्वजनिक बिदाका दिनमा र कार्यालय समयबाहेकको समयमा तथा मन्दिर, वनभोज एवं रेस्टुरेन्टमा जानेजस्ता नितान्त व्यक्तिगत प्रयोजनका लागि प्रयोग गर्ने गरी दुरुपयोग हुने गरेको छ,’ अख्तियारको निर्णयमा भनिएको छ, ‘यस्तो विषयबाट आमजनमानसमा सरकारी निकायप्रति नकारात्मक धारणा पैदा हुने भएकाले निजी प्रयोगमा रोक लगाउन मुख्य सचिवलाई लेखिपठाउने ।’

सरकारी सवारीसाधनलाई सार्वजनिक बिदाका दिन निजी प्रयोगमा ल्याउनेमाथि आफ््नै ढंगले अनुसन्धान गरिरहेको पनि अख्तियारले जनाएको छ । ‘सरकारलाई समेत निर्देशन दिइएको र अख्तियार स्वयंले पनि यस विषयमा चासो राखिराखेको छ,’ प्रवक्ता श्रीधर सापकोटाले भने । सरकारी सवारीमा मात्र नभई अख्तियारले नजिकिँदै गरेको तीज जस्ता पर्व तडकभडकका साथ नमनाउन पनि आग्रह गरेको छ । अख्तियारले चाडपर्वमा तडकभडक गर्नेमाथि कडा निगरानी र कारबाही गर्न प्रहरीलगायतका निकायको ध्यानाकर्षण समेत गराएको छ । ‘नैतिकतामा आधारित समाज निर्माणका लागि’ भन्दै अख्तियारले चाडपर्वमा तडकभडक र फजुल खर्च गर्नेलाई कारबाही गर्न प्रहरीलाई सजग गराउन पत्राचारसमेत गर्ने भएको छ । विवाह, व्रतबन्ध, चूडाकर्म, पास्नी, न्वारान, जन्मदिवस, छैंठी, बूढोपास्नी पितृकार्य र तीज जस्ता पर्व र सामाजिक कार्य भड्किलो बन्दै गएको भन्दै अख्तियारले यस्तो कार्य रोक्न सक्रियता देखाएको हो ।

नेपाल कानुनले समेत यस्ता चाडपर्व र सामाजिक कार्यमा गरिने खर्चको सीमा तोकेको छ । सामाजिक व्यवहार (सुधार) ऐन, २०३३ ले यस्ता पर्वका लागि खर्च र व्यवहारको सीमा तोकेको छ । अख्तियारले सोही ऐनको हवाला दिँदै ऐनविरुद्ध गरिने तडकभडक तत्काल नियन्त्रण गर्न भनेको हो । कानुनले खर्चको सिलिङ तोकेको भए पनि तीज पर्व आउनु एक महिनाअघिबाटै राजधानीमा भड्किला भोज र पहिरन सुरु भइसकेको छ । पर्वका नाममा गहनाको अनावश्यक प्रदर्शन र भड्किलो खान्कीका कारण महिलाहरू लुटिनेलगायतका कार्य हुन थालेपछि अख्तियारले नियन्त्रणमा चासो देखाएको हो ।